दलका नेतालाई भ्रष्टाचार छानबिनका नाममा जेल हाल्ने चलखेल हुनसक्छः प्रचण्ड

नेकपा माओवादी केन्द्रका अध्यक्ष पुष्पकमल दाहाल प्रचण्डले राजनीतिक दलका नेताहरूलाई विभिन्न बहानामा छानबिन गरेर जेल हाल्ने चलखेल सुरु हुनसक्ने बताएका छन् । पार्टीको जारी केन्द्रीय समिति बैठकमा प्रचण्डले पेस गरेको राजनीतिक प्रतिवेदनमा यो विषय उल्लेख छ ।

जेनजी आन्दोलनपछि गैरदलीय सरकार बने पनि उपलब्धिहरू माथिको संकट नटरेको पनि प्रचण्डले उल्लेख गरेका छन् । उनले भनेका छन्, 'विभिन्न बहानामा अराजकता फैलाउने, संविधान खारेज गर्ने, अन्तरिम संविधान जारी गर्ने, लोकतान्त्रिक दलका नेता तथा कार्यकर्ताहरूलाई भ्रष्टाचार छानबिनका नाममा जेल हाल्ने, लोकतान्त्रिक राजनीतिक दलहरूलाई प्रतिबन्ध लगाउने र आफूअनुकूल निर्वाचन र परिणामबाट आफ्नो कठपुतली पात्रमार्फत् स्वार्थ सिद्ध गर्ने र प्रतिगामी तथा प्रतिक्रियावादी चलखेलहरू बाँकी नै रहेका छन् ।'